පලමුව රවටන්න... ඊට පස්සේ සැනසෙන්න ( ගීතයක කතාව - 05 )

අද කියන්න හදන්නෙ විකාර කතාවක්. වෙනදා වගේම තිත්ත කතාවක්....මේක ගීතය මුලින්ම අහන කෙනෙක්ට මේකේ අගක් මුලක් අල්ල ගන්න බැරි වෙනවා නිසැකයි. ආයෙත් දෙපාරක් තුන්පාරක් ගීතය කනේ තියන් අහන කොට එක එක අදහස් එන්න පුලුවන්. වෙලාවකට පාරක් ගැන කියන එකක් ද? කෙල්ලට කොල්ලා කියන එකක්ද? කියලා මාරුවෙන් මාරුවට හිතෙන්න පුලුවන්. ඒත් ඇත්ත ඒකමද...මට හිතෙන්නෙ ඔබ තාමත් මේක හරියට අල්ල ගෙන නැහැ කියලා... ගීතය අමරසිරි පීරිස් නැමති ප්‍රතිභාපූර්ණ ගායන ගීල්පියා ගයන "ඉරි තැලුණු වලා" ගීතය. කතාව අහන්න පටන් ගන්න ඇත්ත තිත්ත බව දැනගෙනම....

ගීතය පටන් ගන්නෙ "ඉරි තැලුණු වලා උඩු වියන් යටින් "කියලානේ. මේකෙන් කියන්නෙ වෙන මොකුත් නෙවෙයි ආර්ථික දුෂ්කරතා ගැන. ආර්ථික ප්‍රශ්නවලින් බැට කන තරුණයෙක් ගැන වගේම තරුණියක් ගැන. මුලු කතාවම කියලා ඉන්නම්කෝ එහෙනම් මුලින්ම. තරුණයෙක් ඉන්නවා ආර්ථික ප්‍රශ්න තියෙන. සමහර විට තාම විවහා වෙලත් නැති කෙනෙක්. මෙයට ඕන වෙනවා ගණිකාවක් ඇසුරුකරන්න. මේ ගණිකාවත් එක්කරගෙන කම්සැප විදින්න යන ගමන තමයි රචකයා මේ ගිතය පුරා විස්තර කරන්නෙ. හරියට තේරුනේ නෑ වගේ නේද කතාව. ටිකක් ඉවසන්න පැහැදිලි කරනකම්.

ගීතයේ මුල්පද ටිකෙන් මේ තරුණයා කියන්නෙ කොච්චර ආර්ථික ප්‍රශ්න තිබුණත් අපි මේ ඇවිදන් යන්නෙ සැපවත් ගමනක් හොයාගෙන. ඉතින් ඒ ගැන හිතලා එන්න කියන එකයි. තරුණයා පාර මෘදුයි කියන්නෙ ගමනෙ කෙලවර තියෙන සැප ගැන හිතලා.. හැබැයි මෙතන වි⁣ශේෂයක් තියෙනවා. එ් තමයි තරුණයා කැමති නෑ සමාජෙට නෝන්ඩි වෙන්න. ගණිකාවක් එක්ක ඇවිදන් යනවා කියලා කවුරුත් දැක්කොත් හොද නෑනේ. ඉතිං මේ දෙන්නා පාරෙ යන්නෙ පෙම්වතුන් වගේ කාටත් සැක නොහිතෙන්න... ඒත් ඒක හිතන තරම් ලේසි වෙන්නෙ නෑ. වට පිටෙ ඉන්න සමහර එවුන් මේ කෙල්ලව දන්නවා. උන් දන්නවා කෙල්ලගෙ කැරැට්ටුව. ඉතිං උන් හිනාවෙන එක අහන්නත් දෙයක්ද. සමහර විට මේ කොල්ලා මේකිට අහුවෙලා ආදරෙ කරනවා කියලා හිතනවද දන්නෙත් නෑ. කොහොම හරි කොල්ලගෙ යෝජනාව තමයි මේ සෙනග රවට්ටලා අපි යමු කියන එක. හැබැයි අපි යන්න ඕනේ කහ ඉරෙන් පාර මාරුවෙලා. ඒ කියන්නෙ නීත්‍යානුකූලව. ඒකෙන් කියන්නෙත් කාටවත් අපි අහුවෙන්නෙ නැති විදිහට කියන එකම තමයි.

මෙහෙම යන කොට වාහන ඇතුලේ සල්ලිකාර මහත්වරු ඉන්න පුලුවන්. උන් උඹට ඉගි කරයි. හැබැයි උඹ මාව දාලා උන්ට පහස දෙන්න යන්න නම් එපා කෙල්ලෙ කියලා තමයි අන්තිම කොටසින් කියන්නෙ. පද රචකයා ගීය අවසන් කරලා තියෙන්නෙත් අපූරු අදහසක් කියලා. ඒ තමයි " කහ ඉරත් රැලි වැටීලා " කියලා. ඒකෙන් කියන්නෙ දැන් නීතියත් වල් වැදිලා තියෙන්නේ. නිතියෙන් අපිට ප්‍රශ්නයක් වෙන එකක් නෑ. එකත් දැන් යහන්ගත වෙලා ඉන්නෙ කියන එකයි.

ගීතයේ අර්ථය ඕක තමයි. හැබැයි මේක නිකන්ම අහලා අතහරින්න පුලුවන් එකක් නෙවෙයි. අපි ඉන්නේ නිව්යෝර්ක් නගරෙ නම් නැත්නම් රමණීය ලන්ඩන් නගරයෙ හවස්වරුවක නම් පෙම්වතුන් ජෝඩුවක් ප්‍රසිද්ධියේ සිප වැලද ගැනිම ගැටලුවක් නොවනු ඇත. බ්‍රසිලයේ ජනාකීර්ණ නගරයක වුවද ගණිකාවකගේ බෙල්ලේ ගණිකාව යැයි එල්ලා කරේ තියාගෙන කාමරයකට එක්කන් ගියද කිසිවෙකුත් කිසිවක් නොවිමසනු ඇත. නමුත් අප සිටින්නෙ මරදාන පොත් වීදියෙහි හෝ පිට කොටුවේ බෝධිය අසල නම් ඔබ ගණිකාවක ගෙන් වෙලාව කියදැයි ඇසුවහොත් ලඟ පාත සිටින උන් සිතනු ඇත්තේ ගාන කියදැයි විමසුවා කියාය. එහෙම එකේ ප්‍රසිද්ධ ගනිකාවක් සමග පාරෙ ගියහොත් ඔබට පෙර සමාජයේ උන් යහන්ගත වී හමාරය. මේ රචකයා අපට කියනුයේ එම කතන්දරයම වෙයි.

ආර්ථිකයෙන් බැට කන තරුණයෙකුට මෙහෙම උනාට සැප ඇත්තන්ට මෙවැනි ගැටලු නැත. උන් ගැහැණුන් අරන් පයින් නොයති. පයින් නොගියද උනුත් සැතපෙන බව සියල්ලෝම දනිති. නමුත් හිනා වනුයේ පිට කොටුවේ හෝ මරදානෙ එකාට පමණි.

ගිතයේ අර්ථය නිවැරදි යැයි සමාජ ගත කිරිමට මා උත්සහ කරනවා යැයි වරදවා වටහා නොගන්න. බොහෝ දෙනා වැරදි කරන එක තමයි ඇත්තම කතාව. ඒ වගේම ඒවා වහගන්න රගපාන ⁣එකත් ගොඩක් උන් කරනවා. ඒකට ගෑණු පිරිමි බේදයකුත් නෑ හොදේ. මේක මේ සිද්ධියට විතරක් ලඝු කරගන්නත් එපා. ගොඩක් වෙලාවට අපිට ජිවත් වෙන්න වෙලා තියෙන්නෙ සමාජයේ ඉන්න එකාලට ඕන විදිහට නේද. එහෙම එකේ මුන් දෙන්නා ප්‍රේමවන්තයෝ වගේ රගපාන එක බොහොම අහිංසකයි කියලයි මට හිතෙන්නේ. අන්තිමට කියන්න තියෙන්නෙ ඔබ ජිවත් වෙන්නෙ ලංකාවෙ නම්, ඔබටත් සමාජය හිනා වෙනවා නම් කරුණාකර මුලින්ම රවටන්න. පස්සෙ සැනසෙන්න........

( චානක දිල්රුක් 2017-08-30 )